БОЛОРАВИИ НАРХИ ЧИНИШИ ПАХТА ДАР СУҒД

Душанбе, 7 октябр. (АМИТ «Ховар», Бекназари Абӯбакр). — Раиси вилояти Суғд Қоҳир Расулзода ба масъулин супориш дод, ки нархи чиниши пахта то 40-50 дирам барои ҳар як килло баланд карда шуда, шароитҳои хуби меҳнатӣ барои ҳашарчиён омода гарданд. Дар ин бора ба АМИТ «Ховар» аз хадамоти раиси вилояти Суғд иттилоъ доданд. Қоҳир Расулзода зимни ҷаласаи корӣ оид ба вазъи кишоварзӣ, 6 октябр ҳолати чиниши пахтаро дар аксари навоҳии пахтакор ва сафарбарии чинакчиёнро суст арзёбӣ намуда, беъэтиноии саҳмдорон ва масъулини соҳаро таъкид намуд. Мавриди зикр аст, ки то 6 октябри соли равон дар вилояти Суғд ба миқдори наздик ба 55 ҳазор тонна пахтаи хушсифат ғундошта шудааст, ки 57,8 фоизи нақшаи истеҳсолиро ташкил медиҳад. Дар вилоят дар майдони 7309 гектар баргрезонӣ (дефолятсия) гузаронида шуда, ноҳияҳои пахтакори Мастчоҳ ва Конибодом нисбат ба соли гузашта пешқадам ҳастанд.