БУҶАИ СОЛИ 2011 ХУСУСИЯТИ ИҶТИМОӢ ДОРАД

       Душанбе, 12 ноябр.(АМИТ «Ховар», Марзия Саидова).-Палатаи  поёнии парлумони мамлакат Қонуни Ҷумҳурии Тоҷикистон «Дар бораи Буҷаи давлатии Ҷумҳурии Точикистон барои соли 2011» -ро қабул кард. Вазири молияи ҷумҳурӣ  Сафаралӣ Наҷмиддинов зимни баромади худ гуфт, ки қисми даромади буҷаи соли 2011-ум   8,3 миллиард ва бахши хароҷоти он 8, 6 миллиард сомониро бо касри 300 миллион ташкил медиҳад.         Буҷаи соли 2011 хусусияти иҷтимоӣ дошта, барои бахши маориф, тандурустӣ ва коҳиши сатҳи камбизоатӣ дар кишвар  наздики 4 миллиард сомонӣ маблағ ҷудо шудааст. Барои ҳифзи иҷтимоӣ ва таъмини нафақа  бошад 1,4 миллиард сомонӣ, бо афзоиши 317 миллион сомонӣ ихтисос дода шудааст.         Мавриди зикр аст, ки сиёсати буҷаи давлатии Ҷумҳурии Тоҷикистон дар соли 2011 давоми мантиқии буҷаи соли ҷорӣ буда, пеш аз ҳама ба афзалиятҳои муҳими давлатӣ, аз ҷумла таъмини ҳифзи иҷтимоии аҳолӣ ва бехатарии озуқаворӣ, раҳоии кишвар аз бунбасти коммуникатсионӣ ва ба даст овардани истиқлолияти энергетикӣ равона гардидааст. Ҳаҷми умумии хароҷоти Буҷаи  давлатӣ дар соҳаҳои номбурда 6137,3 миллион сомониро ташкил медиҳад, ки он 71,4 фоизи ҳаҷми умумии хароҷоти буҷавӣ дар соли 2011 мебошад.