МУЛОҚОТИ Э.РАҲМОН БО ВИҶАЙ КУМАР СИНКҲ

Душанбе, 11 ноябр. (АМИТ «Ховар).- Президенти Ҷумҳурии Тоҷикистон Эмомалӣ Раҳмон Сардори Ситоди Артиши Ҳиндустон Виҷай Кумар Синкҳро ба ҳузур пазируфт. Дар мулоқот масоили ҳамкории Тоҷикистону Ҳиндустон баррасӣ шуд. «Мақоми муҳим доштани ҳамкории низомии Тоҷикистону ҳиндустон дар муносибатҳои дўстонаи ду кишвар  нишонаи шарикӣ ва эътимод аст», — изҳор дошт Сарвари давлат Эмомалӣ Раҳмон. Аз сатҳи баланди муносибатҳо ва пайвастагии робитаҳои сиёсии ду кишвар изҳори қаноатмандӣ карда шуд. Мубодилаи иттилооту таҷриба дар муборизаи байналмилалии зиддитеррористӣ, кўмакрасонии техникӣ ва омодасозии кадрҳо барои қувваҳои Мусаллаҳи Тоҷикистон аз самтҳои асосии ҳамкории низомии ду кишвар арзёбӣ гардид. Гуфтугўйи судманд ҳамчунин атрофи авзои кунунии Афғонистону таъсири манфии он ба кишварҳои ҳамсоя ва тадбирҳои муштараки Тоҷикистону Ҳиндустон доир ба таҳкиму тақвияти амнияти минтақавӣ сурат гирифт. Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.