ҚАБУЛИ ДАСТУРИ МН МО ҶТ

  Душанбе, 22 декабр.(АМИТ «Ховар», Марзия Саидова).-Лоиҳаи Дастури Маҷлиси намояндагони Маҷлиси Олии Ҷумҳурии Тоҷикистон дар ҷараёни баргузории иҷлосияи дуюми палатаи поёнии парлумони мамлакат 22 декабр қабул гардид.     Азизмат Имомов раиси Комиссия оид ба назорати Дастур ва ташкили кори Маҷлиси намояндагон ва Сафаралӣ Раҷабов раиси кумитаи ин мақоми олии қонунгузори мамлакат масъалаи мазкурро шарҳ дода гуфтанд, ки лоиҳаи мазкур бо мақсади фарогирии тамоми самтҳои фаъолияти Маҷлиси намояндагон ва мақомоти он, мутобиқгардонӣ ба муқаррароти қонунгузории Ҷумҳурии Тоҷикистон таҳия шудааст.    Зикр гардид, ки дар асоси хулосаҳои кумитаҳо, бо назардошти аҳамияти махсуси Дастур дар ташкили ҳамаи самтҳои фаъолияти Маҷлиси намояндагон, нақши он дар таъмини самаранокии корҳои ҳар як вакил барои такмили лоиҳаи санади мазкур бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон гурӯҳи  корӣ таъсис дода шуд.         Гурӯҳи корӣ дар раванди фаъолияти худ дар ин замина, шаш ҷаласа гузаронида, дар навбати аввал хулосаҳои кумитаҳои Маҷлиси намояндагон, Ҳукумати Ҷумҳурии Тоҷикистон, шӯъбаи ҳуқуқи Дастгоҳи Маҷлиси намояндагонро мавриди баррасӣ қарор дод.