Ҳизбе, ки манфиатҳои ҷомеаро ҳифз менамояд

Душанбе, 6 сентябр.(АМИТ «Ховар», Марзия Саидова).-Ба ифтихори 20-умин солгарди Истиқлолияти давлатии Ҷумҳурии Тоҷикистон, ки ҳамасола 9 сентябр таҷлил мегардад, бо ибтикори Ҳизби Халқӣ-Демократии Тоҷикистон /ҲХДТ/ дар саросари ҷумҳурӣ 3 ҳазор маҷлису чорабиниҳои гуногуни ҷамъиятию сиёсӣ ва илмию фарҳангӣ баргузор карда шуд. Матлаби мазкурро Сафар Сафаров, муовини аввали Раиси ҲХДТ зимни суханронияш дар конфронси илмӣ-амалӣ, ки таҳти унвони «Ҳизби зодаи Истиқлолият» дар Душанбе баргузор гардид, иброз дошт. Мавсуф афзуд, ки ҲХДТ заминаи боэътимод ва қавии иқтисодию иҷтимоӣ дошта, нақши он дар пешбурди ҳаёти сиёсии кишвар ва ҳифзи манфиатҳои ҷомеаи Тоҷикистон калон аст.Бояд тазаккур дод, ки алҳол ҲХДТ дар сафҳои худ 150 ҳазор нафарро муттаҳид менамояд, ки аз он 6 ҳазор нафарашро занон ва 50 ҳазорашонро ҷавонон ташкил медиҳанд. Чанде қабл иттиҳодияи ҷамъиятии ҷавонони ҲХДТ бо номи «Созандагони Ватан» таъсис дода шуд, ки як қаноти ҲХДТ ба шумор рафта, дар худ ҷавононро муттаҳид менамояд.