Корхонаи муштараки Тоҷикистону Лаҳистон бунёд мешавад

Душанбе, 29 сентябр. (АМИТ «Ховар», Бекназари Абӯбакр). – 28 сентябр дар ҷараёни мулоқоти раиси Палатаи савдо ва саноати Ҷумҳурии Тоҷикистон Шариф Саид ва Сафири Фавқулодда ва Мухтори Ҷумҳурии Лаҳистон дар ҶТ Мариан Пшездзитски дурнамои ҳамкории мутақобилан муфиди миёни соҳибкорони Тоҷикистону Лаҳистон мавриди муҳокима қарор гирифт.Тавре дар маркази матбуоти Палатаи савдо ва саноати Ҷумҳурии Тоҷикистон ба АМИТ «Ховар» иттилоъ доданд, Шариф Саид рушди босуръати ҳамкории дуҷонибаи тиҷоратию иқтисодиро зикр намуда, афзалиятҳои вазъи инвеститсионии Тоҷикистонро васф карда, ҷониби Лаҳистонро даъват намуд, ки дар намоишгоҳи универсалии «Тоҷикистон — 2011», ки бояд 27 – 29 октябри соли равон дар шаҳри Душанбе баргузор гардад, иштирок намояд.Мариан Пшездзитски дар навбати худ зикр намуд, ки дар чаҳорчӯбаи доир намудани иҷлосияи дуюми комиссияи байниҳукуматӣ оид ба ҳамкории тиҷоратию иқтисодӣ, ки 27 – 28 октябри соли равон дар шаҳри Душанбе баргузор мегардад, семинари тоҷирон ва биржаи равобит бо иштироки соҳибкорони ҳар ду кишвар рӯи кор оварда мешавад. Шариф Саид ба манзури рушду тақвият бахшидани ҳамкории дуҷонибаи тиҷоратию иқтисодӣ пешниҳод намуд, ки соли 2012 ба муносибати 20 – солагии барқарор шудани муносибатҳои дипломатии байни кишварҳо намоишгоҳи миллии Ҷумҳурии Лаҳистон дар Тоҷикистон доир карда шавад.