Таҷлили ҷашни созмони ҷамъияти тоҷикон

Душанбе, 29 сентябр. (АМИТ «Ховар», Марҳабо Зунунова). – Ҳафтаи гузашта дар яке аз шаҳрҳои қадимаи Русия – Твер ба ифтихори 10 – солагии таъсиси «Ҷамъияти фарҳанги тоҷикон» иди бошукӯҳе баргузор гардид. Ба ин муносибат дар Қасри фарҳанги шаҳри Твер маҷлиси ботантана ва консерти идона баргузор шуд. Роҳбари маъмурияти шаҳри Твер Василий Борисович Толоко ва роҳбари созмони ҷамъиятии «Ҷамъияти фарҳанги тоҷикон» Муқим Майбалиев зимни суханрониашон аз ризоияти байнимиллӣ ва решаҳои таърихии дӯстии Русия ва Тоҷикистон нақл карданд,Дар ин бора ба АМИТ «Ховар» дар Маркази матбуоти Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия хабар доданд.Роҳбари Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия Асрор Одинаев зимни суханрониаш иброз дошт, ки ҷашни созмони ҷамъиятии тоҷикон ба таври рамзӣ дар рӯзҳои таҷлили 20 — солагии Истиқлолияти давлатии Ҷумҳурии Тоҷикистон сурат мегирад. Номбурда ҳозиронро бо ин санаи фархунда муборакбод намуд. Асрор Одинаев зикр намуд, ки имконияти ҳамкории мутақобилан муфиди байнидавлатӣ бузург буда, президентҳои ҳар ду давлат ният доранд, ки ин захираҳоро ба таври самарабахш истифода намоянд.