Нархи об дар пойтахт баланд мегардад

Душанбе, 6 октябр.(АМИТ «Ховар», Марзия Саидова).-Шурӯъ аз 15 октябри соли 2011 нархи пардохти оби нӯшокӣ ва оби ихроҷӣ дар шаҳри Душанбе баланд мегардад. Нархи пардохт тибқи фармоиши Хадамоти зиддиинҳисории назди Ҳукумати Ҷумҳурии Тоҷикистон тағйир дода мешавад. Шавкат Саидов, котиби матбуотии Раиси шаҳри Душанбе мегӯяд, ин тасмим дар асоси пешниҳоди КВД «Обу корези шаҳри Душанбе» бо назардошти қимат шудани нархи нерӯи барқ, маҳлулҳои безараргардонӣ ва поксозии оби нӯшокӣ, сӯзишвории нафтӣ ва баргардонидани қарзи Бонки Умумиҷаҳонӣ оид ба татбиқи Лоиҳаи обтаъминкунии шаҳри Душанбе қабул гардидааст. Дар асоси муқаррароти зикргардидаи Хадамоти зиддиинҳисории назди Ҳукумати Ҷумҳурии Тоҷикистон аз 15 октябри соли 2011 дар шаҳри Душанбе бар ивази пардохтҳои ҷойдошта баҳр як муштарӣ аз ҳисоби 350 метри мукааб дар як шабонарӯз, дар як моҳ аҳолӣ сари 1 нафар 2,47 сомонӣ, корхонаҳои буҷавӣ 0,71 сомонӣ, корхонаҳои ғайрибуҷавӣ 1,68 сомонӣ ва ташкилотҳои байналмилалию сафоратхонаҳо 1,5 сомонӣ бо тартиби зайл амалӣ карда мешаванд: аҳолӣ 1 нафар 3,50 сомонӣ, корхонаҳои буҷавӣ 1,4 сомонӣ, корхонаҳои ғайрибуҷавӣ 2,71 сомонӣ ва ташкилотҳои байналмилалию сафоратхонаҳо 2,3 сомонӣ.