Боз як қаллоб дастгир шуд

Душанбе, 22 декабр. (АИТ «Ховар», Лаззат Диловарзод).- Аз шӯъбаи тафтишоти корҳои дохилии ноҳияи Фирдавсӣ иттилоъ доданд, ки дар асоси аризаи истиқоматкунандаи кӯчаи Неъмат Қарабоев Ш. Шарипов, ки 5 – уми сентябри соли ҷорӣ дар маҳаллаи Яккачинор шахси ба бовариаш даромада бо номи Тоҷиддин мошини сабукрави тамғаи «АУДИ — 4» — ашро барои чанд дақиқа гирифта ғайб задааст, парвандаи ҷиноӣ кушода шудааст. Ш. Шарипов то 17 –уми декабр борҳо ба маҳаллаи Яккачинор ба суроғи шиноси бедарак ғайбзадааш рафта бошад ҳам, ӯро пайдо карда натавонистааст. Дар шӯъбаи корҳои дохилии ноҳияи Фирдавсӣ дар асоси аризаи воридшуда гурӯҳи фаврии ҷустуҷӯи ҷиноӣ ташкил ёфта, барои дастгир намудани қаллоб корро оғоз намуд. Баъди се рӯзи кофтуков қаллоб Ҷумъаев Тоҷиддин Аломуддинович, ки дар кӯчаи Мушфиқии ноҳияи Фирдавсӣ зиндагӣ доштааст, дастгир гардид. Ҳоло дар шӯъбаи тафтишотии корҳои дохилии ноҳияи Фирдавсӣ нисбат ба дастгиршуда бо моддаи 247 (қаллобӣ) – и КҶ ҶТ парвандаи ҷиноӣ оғоз ёфта, тафтишот давом дорад.