«…охир ба дастӣ малахак»

Душанбе, 26 январ. (АМИТ «Ховар», Лаззат Диловарзод).- Хоҷагиҳои давлатии зотпарварии ба номи «Тӯйчӣ Эрйигитов» -и ноҳияи Ашт ва «Ҳисор» -и ноҳияи Фархор бо вуҷуди дар давоми се соли охир аз ҷониби сохторҳои назоратӣ аз 4 то 7 маротиба мавриди санҷиш қарор гирифтанашон «аз об хушк баромаданд», (ба он маъно, ки камбудиҳои молиявии ин ду хоҷагӣ ошкор карда нашуданд ва ё ошкор карданашонро раво надонистанд).Дар рафти санҷишҳои молиявӣ ва тафтишоти пешакӣ, ки аз ҷониби кормандони Агентии назорати давлатии молиявӣ ва мубориза бо коррупсияи ҶТ дар дар соли 2011 анҷом дода шудааст, муайян карда шуд, ки дар хоҷагии зотпарварии «Тӯйчӣ Эрйигитов» — и ноҳияи Ашт аз 15 ҳазору 123 сар чорвои майдаи хоҷагӣ 7 ҳазору 500 сари он ба маблағи 1 млн. 814 ҳазор сомонӣ тасарруф карда шудааст.Тафтиш дар хоҷагии зотпарварии «Ҳисор»- и ноҳияи Фархор зарари молиявиро аз ҳисоби камомади 2 ҳазору 259 сар чорвои хоҷагӣ ба маблағи 820 ҳазор сомонӣ ошкор сохт.Тибқи маълумоти маркази матбуоти Агентии назорати давлатии молиявӣ ва мубориза бо коррупсия, тафтишоти парвандаи ҷиноятӣ доир ба ин ҳолат бо моддаи 245 қ. 4 (азхудкунӣ)- и КҶ ҶТ ба анҷом расида, бо тасдиқи фикри айбдоркунӣ ба суд ирсол шудааст.Чунонки дар урфият мегӯянд : «Як бор ҷастӣ малахак, ду бор ҷастӣ малахак, охир ба дастӣ малахак!».