Таваҷҷӯҳи ширкатҳои хориҷӣ

Душанбе, 13 март.(АМИТ «Ховар», Марзия Саидова).-«Тайи солҳои охир дар ҷумҳурӣ 80 корхонаи саноатии хиштбарорӣ, 28 корхонаи оҳангудозӣ, 1 корхонаи истеҳсоли шиша ва 17 корхонаи саноати хӯрокворӣ аз истифодаи гази табиӣ ва нерӯи барқ ба истифодаи ангишт гузаштанд», гуфт сардори Раёсати саноати истихроҷи ангишт ва навъҳои алтернативии энергияи Вазорати энергетика ва саноати ҷумҳурӣ Баҳриддин Абдураҳимов. Ба қавли намояндаи Вазорати энергетика ва саноат имрӯз корхонаҳои истихроҷи аништи кишвар талаботи бахшҳои гуногуни иқтисоду ҳаёти иҷтимоии ҷумҳуриро қонеъ карда наметавонанд, аз ин рӯ, дар навбати аввал ба рушди саноати истихроҷи ангишт мебояд таваҷҷӯҳ зоҳир намуд. Бо мақсади таъмини аҳолии кишвар бо ангишт аз соли 2011 тарзи кушоди истихроҷи ангишт истифода мешавад ва теъдоди чунин корхонаҳо ба 12 адад расидааст. Шумори умумии корхонаҳои амалкунанда дар ин бахш 14 ададро ташкил медиҳад, ки 8-тоаш корхонаҳои хусусианд. Баҳриддин Абдураҳимов меафзояд, ки ширкатҳои як қатор давлатҳои хориҷии тӯли се сол дар бахши истихроҷи ангишти ҷумҳурӣ фаъолият дошта то ҳанӯз ба он таваҷҷӯҳ зоҳир месозанд ва дар кашфу коркарди конҳои ангишт то имрӯз беш аз 15 миллион доллари амрикоӣ маблағгузорӣ намудаанд. Бояд тазаккур дод, ки дар соли сипаришуда дар ҷумҳурӣ 236 ҳазор тонна ангишт ба маблағи 25 миллион доллари амрикоӣ истихроҷ шудааст. Қабули лоиҳаи Қонуни Ҷумҳурии Тоҷикистон «Дар бораи ангишт», ки дар парлумони кишвар мавриди баррасӣ қарор дорад, ба рушди саноати кишвар ва муҳайё намудани ҷойҳои нави корӣ мусоидат менамояд.