«Созандагони Ватан» ва САҲА

Душанбе, 20 апрел. (АМИТ «Ховар», Дилшодаи Хайруллоҳ).- 19 апрели соли ҷорӣ мулоқоти раиси Ташкилоти ҷамъиятии ҷавонон «Созандагони Ватан» Адҳам Мирсаидов бо мушовири масоили ҳуқуқӣ ва интихоботи дафтари САҲА дар Тоҷикистон Фредерик Рунстен баргузор гардид.Дар мулоқот вобаста ба фаъолияти ташкилоти «Созандагони Ватан», фаъолнокии сиёсии ҷавонон, ҷалби ҷавонон ба ҳизб, иштироки ҷавонон дар маъракаҳои ҷамъиятиву сиёсӣ ва дигар самтҳо сухан рафт. Аз ҷумла зикр гардид, ки «Созандагони Ватан» новобаста аз созмони навтаъсис буданаш тавонист дар байни ҷавонон ҷойгоҳи худро пайдо ва ҷонибдорону аъзоро қабул кунад. Инчунин доир ба ҷалби ҷавонони деҳот ба корҳои ҷамъиятӣ, маълумотнокии насли ҷавон ва вобаста ба масъалаҳои гендерӣ ибрози назар карда шуд. Дар навбати худ намояндаи САҲА Фредерик Рунстен аз чунин самти кор бо ҷавонони Ҳизби Халқии Демократии Тоҷикистон изҳори қаноатмандӣ карда, зикр намуд, ки рушди арзишҳои демократӣ ва ташаккули ҷомеаи шаҳрвандӣ дар Ҷумҳурии Тоҷикистон боиси дастгирӣ буда, САҲА омода аст барои баланд бардоштани маърифатнокии ҷавонон, махсусан ҷавонони манотиқи дурдасти Тоҷикистон дар ҳамкорӣ бо ҷавонони аҳзоби сиёсӣ, аз ҷумла ташкилоти ҷамъиятии ҷавонони ҲХДТ «Созандагони Ватан» дар ин раванд саҳмгузор бошад.