«Корвони китоб» дар Бадахшон

Хоруғ, 18 июл. (АМИТ «Ховар», Л.Додо ). – Имрӯз «Корвони китоб», ки маҳз бо ҳидояти Президенти кишвар Эмомалӣ Раҳмон рӯи кор омадааст, вориди маркази ВМКБ — шаҳри Хоруғ гардид. Корвонро дар шаҳри Хоруғ муовини раиси вилоят, роҳбарони муассисаҳои фарҳангу Раёсати маориф, сокинони шаҳр, тарбиягирандагони боғчаҳои бачагонаи шаҳри Хоруғ истиқбол карданд. Роҳбари корвон Саидҷаъфар Сафаров – сардори корхонаи давлатии таъмин ва савдои китоб иброз дошт, ки 16 – уми июл дар ноҳияи Дарвоз базми китоб баргузор гардид. Дар ҳайати корвон инчунин дастаи ҳунарии «Сомон» таҳти сарпарастии ҳофизи мардумии ҷумҳурӣ Қурбоналӣ Раҳмон шомил аст. Аъзои даста дар ин ҷо бо консерти пурмӯҳтаво ҳунарнамоӣ карданд. Рӯзҳои 17 ва 18 — уми моҳи июл чунин базми китоб дар ноҳияи Ванҷ ҷараён гирифт.