Афзоиши маҳсулоти корхонаҳои саноатӣ

Душанбе, 18 сентябр. (АМИТ «Ховар», Лаззат Диловарзод).- Маҳсулоти корхонаҳои саноатии ҶТ нисбат ба ҳамин давраи соли 2011 ба андозаи 11,7 фоиз зиёд шудааст,-иттилоъ доданд аз Агентии омори назди Президенти ҷумҳурӣ ба мухбири АМИТ «Ховар».Ба иттилои манбаъ, дар давоми моҳҳои январ-августи соли 2012 корхонаҳои саноатии Ҷумҳурии Тоҷикистон ба маблағи 5 млрд. 904 млн. сомонӣ маҳсулот истеҳсол намуданд. Асосан афзоиши истеҳсоли маҳсулоти саноатӣ аз ҳисоби зиёдшавии маҳсулоти корхонаҳои Вазорати энергетика ва саноат, аз ҷумла истихроҷи нафту газ, ангишт ва намудҳои алтернативии энгергия, маъдан ва филизоти қиматбаҳо, мошинсозӣ, истеҳсоли маҳсулоти саноати сабук, масолеҳи бинокорӣ, маҳсулоти корхонаҳои воҳиди давлатии «Хӯрокворӣ», «Ғалла», «Гӯшту шир» ва маҳсулоти корхонаҳои соҳаи пахтатозакунӣ ба вуҷуд омадааст.