Мулоқоти Э. Раҳмон бо Мудири кулли Кумитаи шарқии иқтисоди Олмон

Душанбе, 6 сентябр. (АМИТ «Ховар»).-Нимаи дуюми рӯз Президенти кишвар Эмомалӣ Раҳмон ҳайати иқтисодии Ҷумҳурии Федералии Олмонро, ки таҳти роҳбарии Мудири кулли Кумитаи шарқии иқтисоди Олмон пофессор Райнер Линднер ба Душанбе ташриф овардаанд, ба ҳузур пазируфт.Зимни суҳбати пурмуҳтаво аз рушди бемайлони муносиботи Тоҷикистону Олмон изҳори қаноатмандӣ карда шуд.Ин мулоқот ва форуми соҳибкорону тоҷирони ду кишвар дар шаҳри Душанбе натиҷаи робитаҳои сатҳи олии Тоҷикистону Олмон, аз ҷумла сафари расмии Президенти Ҷумҳурии Тоҷикистон ба ин кишвар дар моҳи декабри соли 2011 ва ташрифҳои имсолаи Раиси Агентии энергетикии Олмон Штефан Колер ва Вазири федералии он оид ба ҳамкории иқтисодӣ ва рушд Дирк Нибел ба Тоҷикистон номида шуд.Изҳори боварӣ карда шуд, ки Бизнес-форуми имрӯза ба раванди мушаххас гардондани мундариҷаи ҳамкориҳои ду кишвар, бахусус дар бахши энергетика, аз ҷумла барои истифодаи манбаъҳои таҷдидшавандаи энергия такони тоза мебахшад.Ба ташкил ва густариши ҳамкорӣ дар соҳаҳои саноати сабук, хӯрокворӣ, коркарди захираҳои минералӣ ва бахши агросаноатӣ низ изҳори ҳавасмандӣ карда шуд.Тавачҷуҳи хоса, ҳамчунин ба иштирок дар лоиҳаҳои бузурги зербиноии минтақавӣ, ки бо фарогирии Афғонистон ва дигар кишварҳои Осиёи Ҷанубӣ амалӣ хоҳанд шуд, зоҳир гардид.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.