Ситоди ҳаҷ-2012 : меҳмонхонаҳо барои қабули ҳоҷиён омодаанд

Душанбе, 21 сентябр. (АМИТ «Ховар», Дилшодаи Хайруллоҳ)- Имрӯз дар толори Кумитаи корҳои дини назди Ҳукумати Ҷумҳурии Тоҷикистон ҷаласаи ситоди “Ҳаҷ-2012” баргузор гардид. Дар ҷаласа Раиси Кумитаи мазкур Абдураҳим Холиқов , намояндаҳои Дастгоҳи иҷроияи Президенти Ҷумҳурии Тоҷикистон, Вазорати тандурустӣ ва Кумитаи давлатии амнияти миллии Ҷумҳурии Тоҷикистон иштирок доштанд. Дар оғоз масъулини соҳа аз сатҳи омодагӣ ба мавсими Ҳаҷ-2012 ва корҳои анҷомёфта ба раиси Кумита гузориш доданд.Масъалаҳои вобаста ба омодасозии зоирини тоҷик ба мавсими ҳаҷ, тақсими либос ба онҳо, расонидани ёрии тиббӣ ба зоирин дар Маккаи мукаррама ва Мадинаи мунаввара аз муҳимтарин мавзӯъҳои ҷаласа буданд.   Зикр гардид, ки ба хотири дар сатҳи баланд гузаронидани мавсими “Ҳаҷ-2012” бояд тамоми чораҳои зарурӣ дида шаванд, то зоирин аз сатҳи хизматрасониҳои ситоди ҳаҷ ва роҳбаладон розӣ бошанд.Ҳамчунин овехтани рамзҳои миллӣ дар меҳмонхонаҳо, аз ҷумла парчами миллӣ ва пахш намудани филмҳо дар бораи Тоҷикистон ба забонҳои хориҷӣ дар меҳмонхонаҳо ҳамчун кори муҳим арзёбӣ гардид.