150 нафар сарбози Раёсати қӯшунҳои дохилӣ қасам ёд кард

Душанбе, 30 октябр. (АМИТ «Ховар», Лутфия Эшонкулова).- Дар қисмҳои низомии 35-02 ва 65-92-и Раёсати қӯшунҳои дохилии Вазорати корҳои дохилии Ҷумҳурии Тоҷикистон маъракаи қасамёдкунӣ баргузор гардид. Фармондеҳи Раёсати қӯшунҳои дохилии ВКД полковник Неъматулло Қурбонов иштирокчиёни маросимро бо ин рӯзи хурсандӣ табрик гуфта, зикр кард, ки пояи асосии амнияти кишвар- ин насли имрӯза, ҷавонони бонангу ори тоҷик мебошанд. Дар маъракаи навбатӣ 150 нафар наваскар ботантана қасам ёд карда, ҷонфидо будани худро барои оромиву осудагии халқу кишвар иброз доштанд.` Волидайни наваскарон бо шароити аскарон аз наздик шинос шуда, изҳори қаноатмандӣ намуданд ва ба фарзандони худ хизмати сарбаландонаро таманно карданд.Мавриди зикр аст, ки Раёсати қӯшунҳои дохилӣ зерсохтори Вазорати корҳои дохилӣ ба ҳисоб рафта, ҳамасола ба ин раёсат зиёда аз якуним ҳазор нафар ҷавон барои адои қарзи шаҳрвандӣ, яъне хизмат ба Ватан-Модар меоянд. Боиси ифтихор аст, ки солҳои охир сафи хизматчиёни бо хоҳиши худ омада меафзояд ва ин маънои онро дорад, ки насли ҷавон барои ояндаи дурахшони Ватан, ки яке аз шохаҳояш Қувваҳои Мусаллаҳ аст, масъулият ҳис мекунад.