Кишоварзони аштӣ нақшаи ҷамъоварии пахтаро иҷро карданд

Душанбе, 12 октябр, (АМИТ «Ховар» Зарангез Латифова).- Тибқи итттилои Раёсати кишоварзии вилояти Суғд, соли равон деҳқонони ноҳияи Ашт 8 ҳазору 703 тонна ҳосили пунбадона ҷамъоварӣ намуданд, ки 100,3%-и нақшаро ташкил медиҳад. Тавре ки ба мухбири АМИТ «Ховар» аз Раёсати кишоварзии вилояти Суғд хабар доданд, аз аввали мавсим кишоварзони вилояти Суғд 94 ҳазору 718 тонна ҳосили пахта ҷамъоварӣ намуданд, ки ба 84,1%-и нақша баробар аст. Дар ҳамин давраи соли гузашта деҳқонони минтақаи шимоли ҷумҳурӣ 97 ҳазору 683 тонна пахта ҷамъоварӣ карда буданд, ки 93%-и нақшаро ташкил медод. Соли равон дар вилояти Суғд дар майдони 61 ҳазору 172 гектар пунбадона кишт шуда, ҷамъоварии 112,5 ҳазор тонна ҳосил ба нақша гирифта шудааст. Гуфта мешавад, ки имрӯзҳо ноҳияҳои Сптамен, Конибодом ва Ашти вилояти Суғд аз иҷрои нақшаи пахта хабар дода, ноҳияҳои Ҷаббор Расулов (86,9%) ва Мастчоҳ (78,4%) дар арафаи анҷомдиҳии нақша қарор доранд.