Корҳои созандагӣ дар Ашт

Ашт, 23 октябр. (АМИТ «Ховар», Мирзалӣ Амонов).-Дар ноҳияи Ашт бо саҳму иштироки соҳибкорони ватанӣ корҳои созандагиву бунёдкорӣ авҷу вусъат доранд. Соҳибкори маҳаллӣ Уткур Муродалиев аз ҳисоби даромадҳои тиҷорат дар маркази ҷамоати деҳоти Понғоз – ноҳияи Ашт, дар асоси лоиҳаи замонавӣ маркази савдою хизматрасонӣ бунёд намуд. Маркази нави савдою хизматрасонии «Зафар» барои таъминоти аҳолии деҳот бо молу маҳсулот, ташкили фароғат, баргузор намудани чорабиниҳои оммавию фарҳангӣ пешбинӣ ва баҳри ин ҳамаи шароитҳои замонавӣ муҳайё карда шудааст. Дар рӯзи ифтитоҳи ин иншооти замонавӣ соҳибкор бо кӯмаку мусоидати мақомоти иҷроияи ҳокимияти давлатии ноҳия хатнасури 20 нафар писарбачаҳо – фарзандони оилаҳои ниёзманди деҳаҳои ҷамоати Понғозро баргузор намуд. Ин қабил марказҳо шумораи муайяни аҳолии бешуғлро бо ҷои корӣ таъмин намуда, барои баланд бардоштани шароити иҷтимоию фарҳангии сокинони деҳот мусоидат менамояд.