Бунёди шаҳраки “Диёри Душанбе” дар пойтахт

Душанбе, 17 декабр. (АМИТ «Ховар», Сарвинози Руҳуллоҳ). –Ширкати қатарии “Қатар Диёр” дар Тоҷикистон шаҳраки наверо бо номи “Диёри Душанбе” бунёд мекунад. Намояндагони ширкати “Қатар Диёр” мегӯянд, ки ин шаҳрак тақрибан дар 7 гектар замин бунёд гардида, дар он аз рӯи нақша 5 бинои истиқоматӣ, марказҳои тиҷоратӣ, минтақаи меҳмоннавозӣ ва кӯдакистон сохта хоҳад шуд. “Қатар Диёр” дар 29 давлати пешрафтаи дунё фаъолият дорад. Тоҷикистон аввалин кишвари Осиёи Марказист, ки аз сармояи давлати Қатар барои сохмони хонаҳои истиқоматӣ истифода мекунад. Саад ал- Отаибӣ, раҳбари минтақавии ширкати «Қатар Диёр» гуфт: ”Марҳилаи аввали сохтмони «Диёри Душанбе», ки аз ибтидои моҳи ноябри соли ҷорӣ шурӯъ шудааст, бояд дар муддати 18 моҳ ба охир расида ва ба истифода дода шавад. Ин аввалин сармояи давлати Қатар дар Тоҷикистон аст ва барои хариди хонаҳо на ба хориҷиён, балки бештар ба мардуми тоҷик аҳамият дода мешавад, зеро хонаҳо асосан барои муштариёни тоҷик сохта хоҳанд шуд”. Хонаҳое, ки дар ин шаҳрак бунёд мешаванд, аз биноҳои дигари пойтахт ба куллӣ фарқ дошта ва нархи ҳар як хона дар ин шаҳрак аз 200 то 500 ҳазор доллари амрикоиро ташкил медиҳад. Маврид ба зикр аст, ки ширкати “Қатар Диёр” дар ин шаҳрак биноҳои истиқоматии аз 2 то 12 ошёна месозад, ки дар онҳо хонаҳои аз 2 то 4 ҳуҷрагӣ пешбинӣ шудааст. Дар ин шаҳрак 400 оила ҷойгир хоҳад шуд. Ба гуфтаи масъулин, ширкат масолеҳи сохтмониро аз Туркия, Қатар ва Иёлоти муттаҳидаи Араб харидорӣ мекунад.