25 000 сомонӣ барои ҷойи аввал

Душанбе, 17 январ. (АМИТ «Ховар», Музаффар Рустамов).– Федератсияи дзюдои кишвар дар ҳамкорӣ бо Кумитаи ҷавонон, варзиш ва сайёҳӣ аввалин мусобиқаи мутлақи кушодаи ҷумҳуриявиро дар намуди дзюдо ба хотираи гиромидошти Президенти фахрии дзюдои ҶТ, чемпиони ҷаҳон оид ба самбо Саидмуъмин Раҳимов доир мекунад.   Мақсади мусобиқа тарғиби гӯштини дзюдо байни ҷавонон, мустаҳкам намудани дўстию рафоқат миёни кишварҳои хориҷӣ ва баланд бардоштани малакаю маҳорати олии варзишгарон ба ҳисоб меравад. Дар мусобиқаи мазкур варзишгарон (мардҳо аз синни 18 боло)-и шаҳру ноҳияҳои тобеи ҷумҳурӣ, вилоятҳо, шаҳри Душанбе ва кишварҳои хориҷӣ метавонанд иштирок кунанд. Мусобиқа аз рўи вазни мутлақ аз 81 кг боло гузаронида мешавад. Ба иттилои сухангӯи Кумитаи миллии олимпии ҶТ Муродалӣ Тешаев варзишгароне, ки дар вазнҳои худ ҷойҳои 1, 2 ва 3- юмро ишғол менамоянд, бо диплом ва медали Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон қадрдонӣ мешаванд. Барои ғолибон ва ҷоизадорон аз тарафи Федератсияи дзюдои Ҷумҳурии Тоҷикистон мукофотҳои нақдӣ:-барои ҷои аввал 25000 сомонӣ-барои ҷои дуюм 10000 сомонӣ-барои ҷойҳои сеюм 7000 сомонӣ (ду ҷои сеюм) пешбинӣ шудаанд. Мусобиқа 6 апрели соли 2013 дар Маҷмааи варзишии Кумитаи андози Ҷумҳурии Тоҷикистон баргузор мешавад.