ВТ : Дар ҷумҳурӣ авҷи бемории сил боздошта шуд

Душанбе, 10 январ. (АМИТ «Ховар», Ибодат Давлатова).-Дар ҷумҳурӣ авҷи минбаъдаи бемории сил боз дошта шуда, мувофиқи омори расмии Вазорати тандурустӣ беморшавӣ дар соли 2007 – 85,1 ва дар соли 2012 тибқи нишондиҳандаи пешакӣ 71,7 ба 100 000 аҳолӣ баробар шудааст. Нишондоди фавт мутаносибан соли 2007 6,3 ва дар соли 2012 тибқи нишондиҳандаи пешакӣ 4,0 ба 100 000 аҳолӣ баробар шудааст. Вазорати тандурустӣ бо мақсади сари вақт ошкор кардани бемории сил, аз ҷумла сили шакли мутобиқгашта ва дигар бемориҳои сироятӣ, дар доираи ҳамкориҳои мутақобилан судманд бо озмоишгоҳи Ассотсиатсияи Мерёи давлати Фаронса, бо дастгирии Хазинаи глобалӣ оид ба назорати бемориҳои сил, ВНМО/БПНМ ва вараҷа дар ҳудуди Пажуҳишгоҳи гастроэнтерология озмоишгоҳи минтақавии тандурустии ҷамъиятии ба номи Рудолф Мерёро бо маблағи 2 838 347 доллари ИМА бунёд кард. Бояд зикр кард, ки чунин озмоишгоҳи замонавӣ ва пуриқтидор то ҳол дар давлатҳои Иттиҳоди Давлатҳои Мустақил арзи вуҷуд надорад.