Телевизорҳои замонавӣ ба қисмҳои низомии вилояти Суғд

Душанбе, 21.05.2014. (АМИТ «Ховар», Лайло Тоирӣ).- 20 май дар театри мусиқавӣ — мазҳакавии ба номи Камоли Хуҷандии маркази вилоят 20 — солагии таъсиси Қӯшунҳои сарҳадии Кумитаи давлатии амнияти миллии Ҷумҳурии Тоҷикистон бо иштироки роҳбарияти мақомоти иҷроияи ҳокимияти давлатии вилоят, роҳбарони мақомоту идораҳои ҳарбӣ, афсарону сарбозону қисмҳои низомии ҳудуди вилоят, намондагони аҳли зиё ҷашн гирифта шуд.
Раиси вилояти Суғд Абдураҳмон Қодирӣ  афсарону сарбозон, хизматчиёни ҳарбии ҷузъу томҳои ҳудуди вилоят ва собиқадорони соҳаро бахшида ба 20 — солагии таъсиси Қӯшунҳои сарҳадии Кумитаи давлатии амнияти миллии Ҷумҳурии Тоҷикистон табрик гуфта, Артиши миллии муқтадиру муҷаҳҳазро асоси пойдорӣ ва ҳастии ҳар миллату давлат арзёбӣ кард.
Ҳамчунин таъкид шуд, ки давлату Ҳукумати Ҷумҳурии Тоҷикистон ҷиҳати беҳтарсозии дидбонгоҳҳои сарҳадӣ ва шароити хизматчиёни  ҳарбӣ ҳамасола корҳои назаррасро ба анҷом мерасонанд ва бо ин мақсад ба таври ҳамешагӣ маблағҳои зарурӣ равона  мешаванд.
Бояд гуфт, ки дар ин рӯз ҳамчунин як гурӯҳ фаъолон бо сипосномаву тӯҳфаҳои хотиравӣ қадршиносӣ шуданд. Ҳамзамон таъкид шуд, ки ҳамаи қисмҳои низомии қувваҳои сарҳадии ҳудуди вилоят бо телевизорҳои замонавӣ таъмин  мешаванд.
Дар ин бора аз хадамоти матбуоти раиси вилояти Суғд иттилоъ доданд.