Баррасии методикаи ҳисобҳои истифодаи молтаъминкунӣ

Душанбе, 02.06.2014. (АМИТ «Ховар, Мавҷуда Анварӣ). — Ҳафтаи гузашта дар Агентии омори назди Президенти ҶТ оид ба методикаи ҳисобҳои истифодаи молтаъминкунӣ ва тавозуни озуқавории ташкилоти озуқа ва кишоварзии СММ семинар доир гардид. Директори агентӣ Гулнора Ҳасанова барои пешниҳоди кумаки техникӣ оид ба татбиқи лоиҳаи «Дастгирии тақвияти низоми миллии иттилооти амнияти озуқавории Тоҷикистон» миннатдорӣ изҳор намуда, муҳимияти истифодаи стандартҳои байналмилалиро барои таҳияи тавозуни озуқаворӣ баҳри тавсифи ҳолати воқеии таъминоти озуқаворӣ дар мамлакат зикр кард. Коршиноси шуъбаи омори Ташкилоти озуқа ва кишоварзии СММ Расмия Алиева оид ба методологияи Ташкилоти озуқа ва кишоварзии СММ вобаста ба таҳияи тавозуни озуқаворӣ, шарҳи тартиби таҳияи тавозуни озуқаворӣ дар Тоҷикистон ва тавсияҳо гуфт, ки тавозуни оузқаворӣ ҳамчун унсур барои таҳлил ва қабули қарорҳо дар масъалаҳои арзёбии ҳолати озуқаворӣ ва кишоварзӣ дар мамлакат, ҳисоби норасоӣ ва зиёдомади умумӣ дар асоси меъёрҳое, ки бо арзиши энергиянокӣ ифода шудаанд (Ккал), ҳамчунин сафеда, карбонгидратҳо ва равған, иттилоот дар бораи воридшавии озуқа ба ҳар сари аҳолӣ, ки бо худ коэффитсиенти чандирӣ, аҳолӣ ва ғайраҳоро дар бар мегирад, барои таҳияи дурнамои талаботи мамлакат бо озуқа, муқаррар намудани алоқамандии воридшавии миллии маҳсулот ва истеъмолоти нокифоя, арзёбии сиёсати озуқа ва истеъмолот, хазинаи таҳлилҳои сиёсат оид ба таъмини амнияти озуқаворӣ зарур аст.Иштирокчиёни семинар тавсияҳои пешниҳод намударо мавриди баррасӣ қарор доданд.