Назорат пурзӯр мешавад

Душанбе,2.06.2014. (АМИТ «Ховар», Лайло Тоирӣ).- Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд аз оғози соли равон вобаста ба назорати фаъолияти ширкатҳое, ки бо ҷалби қувваи кории хориҷӣ фаъолият доранд, гузаронидани санҷишҳои назоратиро ба роҳ мондааст.Бино ба иттилои ин раёсат, аз рӯи ҷамъбасти натиҷаҳои фаъолияти 5-моҳа маълум гардид, ки дар ин давра дар 35 корхонаи муштарак ва ширкат аз ҷониби гурӯҳҳои санҷишии Раёсат санҷишҳои назоратӣ гузаронида шуда, зимни он нисбат ба шаҳрвандони хориҷӣ 27 парвандаи ҳуқуқвайронкунии маъмурӣ оғоз гардидааст.Ёдовар мешавем, ки аз 12 май то охири ин моҳ дар қаламрави вилояти Суғд низ марҳилаи якуми амалиёти махсуси «Нелегал — 2014» гузаронида шуд, ки аз ҷумлаи парвандаҳои ҳуқуқвайронкунии мазкур 19-тоаш дар доираи ҳамин амалиёт оғоз шудааст.Дар маҷмӯъ, сармутахассисони дастгоҳи Раёсат ва гузаргоҳҳои наздисарҳадӣ аз аввали сол то 29 май 127 ҳодисаи ҳуқуқвайронкунии маъмуриро аз ҷониби шаҳрвандони хориҷӣ ошкор намуда, парванда оғоз карданд. Дар ин самт хусусан кормандони гузаргоҳи наздисарҳадии «Фурудгоҳи байналмилалии Хуҷанд» фаъол мебошанд.