Дар Душанбе автодроми нав ба истифода дода мешавад

Душанбе, 5.09.2014. (АМИТ «Ховар», Бекназари Абӯбакр). — «Мехоҳам як нуктаро махсус таъкид намоям, ки агар таъмиру навсозии роҳҳои мошингард ва ба меъёрҳои ҷаҳонӣ мутобиқ намудани онҳо як тарафи масъалаи аз бунбасти коммуникатсионӣ раҳоӣ бахшидани кишвар бошад, тарафи дигари масъала нигоҳдорӣ ва масъалаи истифодаи роҳҳо, яъне маданияти роҳдорӣ ва ронандагӣ мебошад, ки он вазифаи масъулони соҳа ва ҳар як фарди огоҳу ватандӯст ба ҳисоб меравад», — тазаккур Сарвари Давлат Эмомалӣ Раҳмон 5 сентябр зимни ифтитоҳи Маҷмааи корхонаҳо дар пойтахт.
Эмомалӣ Раҳмон афзуд, ки бо ин мақсад дар назди марказ мактаби омодасозии ронандагон таъсис дода шудааст, ки бо таҷҳизоти зарурии бақайдгирӣ, машқу таълими ронандагон ва воситаҳои муосири компютерӣ муҷаҳҳаз буда, дар он омӯзиши масъалаҳои таъмиру идораи воситаҳои нақлиёт ва қоидаҳои ҳаракат дар роҳ дар сатҳи баланди касбӣ ба роҳ монда шудаанд.
Бояд гуфт, ки таъсиси мактаби мазкур дар низоми идораи воситаҳои нақлиёт ва таъмини бехатарии шаҳрвандон иқдоми саривақтӣ буда, танҳо ба як курси омӯзишӣ то 120 шунаванда ҷалб мешавад, ки ба онҳо мутахассисони касбӣ ва соҳибтаҷриба нозукиҳои касби ронандагӣ ва заминаҳои ҳуқуқии қонунгузории ҳаракат дар роҳ, инчунин маданияти истифода аз воситаҳои нақлиётро меомӯзонанд.
Президенти кишвар мужда дод, ки фардо дар шаҳри Душанбе боз як майдони мошинронӣ, яъне автодроми нав ба истифода дода мешавад, ки дар бобати таълими ронандагӣ ва боз ҳам беҳтар гардидани маҳорату малакаи ронандагон саҳми назаррас хоҳад гузошт.
Қобили зикр аст, ки дар маркази таълимии ифтитоҳшуда барои муайян намудани ҳолати техникии воситаҳои нақлиёт таҷҳизоти замонавии истеҳсоли олмонӣ насб шудааст, ки дар он дар як рӯз зиёда аз 100 воситаи нақлиёт тибқи меъёрҳои ҷаҳонӣ аз ташхиси техникӣ гузаронида мешавад.