Иловаҳо ба қонуни милитсия: пешниҳоди Ҳукумат

Душанбе, 14.10.2014.(АМИТ «Ховар», Марзия Саидзода).-Интизор меравад, ки рӯзҳои наздик палатаи поёнии Парлумони мамлакат пешниҳоди Ҳукумати  Ҷумҳурии Тоҷикистон доир ба ворид намудани иловаҳо ба лоиҳаи  Қонуни Ҷумҳурии Тоҷикистон «Дар бораи милитсия» -ро баррасӣ ва қабул намояд.
             Ин масъала  дар ҷаласаи Шӯрои палатаи поёнии Парлумони Тоҷикистон таҳти раёсати Шукурҷон Зуҳуров-раиси Маҷлиси намояндагон баррасӣ гардид.
      Саттор Холов-вакили  Маҷлиси намояндагон зимни тавзеҳи лоиҳаи қонуни мазкур гуфт, ки зарурати ворид намудани иловаҳо ба лоиҳаи Қонуни Ҷумҳурии Тоҷикистон «Дар бораи милитсия» пешгирӣ ва бартараф намудани  бетартибиҳои оммавиест,  ки иштирокчиёни гирдиҳамоиҳо, намоишҳо ва роҳпаймоиҳо метавонанд содир намоянд,  инчунин ҳифзи амнияти давлат ва таъмини бехатарии шаҳрвандон аз кирдорҳои зиддиҳуқуқӣ дар ҷараёни бетартибиҳои оммавӣ  мебошад.
            Тавре ки зикр гардид, лоиҳаи қонуни мазкур аз ҷониби Ҳукумати  Ҷумҳурии Тоҷикистон ҷиҳати баррасӣ ва қабул ба Парлумон ироа гардидааст.
          Аъзои Шӯрои Маҷлиси намояндагон дар ҷаласа ҳамзамон лоиҳаи қонунҳои Ҷумҳурии Тоҷикистон «Дар бораи ворид намудани илова ба Қонуни Ҷумҳурии Тоҷикистон «Дар бораи мубориза бар зидди терроризм» ва «Оид ба ворид  намудани тағйиру иловаҳо ба Қонуни Ҷумҳурии Тоҷикистон «Дар бораи  мубориза бар зидди ҷинояткории муташаккилона»-ро баррасӣ намуданд.