Муқовимат ба таҳдидҳои наву хатарҳои имрӯзаи мухаддиротӣ

Душанбе, 20.11.2014 (АМИТ «Ховар», Мавҷуда Анварӣ).-  Дирӯз роҳбари Агентии назорати маводи нашъаовар Рустам Назарзода бо сафири Фавқулода ва Мухтори Мексика дар Ҷумҳурии Исломии Эрон ва Ҷумҳурии Тоҷикистон Улисес Канчол мулоқот намуд.
Директори агентӣ ба Улисес Канчол дар бораи сатҳи ҳамкориҳо бо мақомоти ҳифзи ҳуқуқи салоҳиятдор дар мубориза бо муомилоти ғайриқонунии маводи нашъадор, вазъи нашъамандӣ дар ҷумҳурӣ ва сиёсати зиддимухаддиротии кишвар маълумоти муфассал пешниҳод намуд.
Мақсади асосии вохӯрӣ аз муҳокимаи масъалаҳои вобаста ба дурнамои ҳамкориҳо дар самти мубориза бо муомилоти ғайриқонунии маводи нашъадор миёни Тоҷикистон ва Мексика арзёбӣ гардид.
Ҷонибҳо зикр карданд, ки механизми ҳамкориҳои мавҷудбудаи ду кишвар имконият медиҳад ба таҳдидҳои нав ва хатарҳои имрӯзаи мухаддиротӣ устоворона ва қотеона муқовимат нишон диҳанд.
Худи ҳамон рӯз дар доираи баргузории вохӯрии Гурӯҳи Мини-Дублин Р. Назарзода бо афсари алоқа оид ба мубориза бо маводи нашъадори сафорати Итолиё дар Ӯзбекистон ва Тоҷикистон Федерико Куатрини ва ҳамоҳангсози минтақавии Агентии миллии мубориза бо ҷинояткории Британияи Кабир ва Ирландияи Шимолӣ (NCA) дар кишварҳои Осиёи Марказӣ Фредерик Хеллон вохӯрӣ гузаронид.
Дар вохӯрӣ масъалаҳои баланд бардоштани ҳамкориҳои самараноки дуҷониба дар самти мубориза бо муомилоти маводи нашъадор мавриди муҳокима қарор дода шуданд.
Зикр гардид, ки ҳукумати ду давлат ба масъалаҳои мубориза бо муомилоти ғайриқонунии маводи нашъадор дар минтақа диққати асосӣ медиҳад.