Касбомўзӣ ҷиҳати беҳдошти шароити мусоид

Душанбе, 02.12.2014. (АМИТ «Ховар», Лайло Тоирӣ).- Филиали Муассисаи давлатии Маркази таълими калонсолони Тоҷикистон дар шаҳри Хоруғ (ФМДМТКТ) тавассути намояндагии худ дар ноҳияи Шуғнон дар ҳамкорӣ бо Агентии шуғли аҳолии ноҳияи Шуғнон аз ҳисоби барнома барои 33 нафар зани хонашин дар ду ҷамоати ноҳия курси думоҳаи касбомўзӣ ташкил намуд. Ба омўзиш 18 нафар дар ҷамоати деҳоти Навобод ба касби тоқидўзӣ ва 15 нафар дар ҷамоати деҳоти Сучон ба касби гулдўзӣ фаро гирифта шуданд. Зиёда аз 50% касбомўзон аз оилаҳои муҳоҷирони меҳнатӣ мебошанд.
Тавре ки аз Хадамоти муҳоҷират иттилоъ доданд, дар нуҳ моҳи соли равон аз тарафи муассисаи мазкур тавассути намояндагии он дар ноҳияи Шуғнон, дар заминаи литсейи касбии техникии №77 аз рўи касбҳои хизматрасонӣ, устои таъмири нақлиёт ва ошпаз 30 нафар, дар ҷамоати деҳоти Ванқалъа аз рўи омўзиши касби асосҳои компютерӣ 15 нафар, дар ҷамоати деҳоти Поршнев аз рўи касбҳои дўзандагӣ ва омўзиши асосҳои компютерӣ 30 нафар, дар ҷамоати деҳоти Вер аз рўи касби дўзандагӣ 15 нафар, дар ҷамоати деҳоти Ғ. Шаҳбозов аз рўи касби сангтарошӣ 15 нафар ва дар ҷамоати деҳоти М.Ширинҷонов аз рўи касби коркарди меваю сабзавот 15 нафар ба касбомўзӣ фаро гирифта шуд.
Бахши Хадамоти муҳоҷират дар ноҳияи Шуғнон тасмим гирифтааст, ки минбаъд ҳам дар ҳамкорӣ бо шуъбаи агентии шуғли аҳолии ноҳия ва намояндагии ФМДМТКТ ноҳия оилаҳои муҳоҷирони меҳнатиро ба касбомўзӣ бештар ҷалб намояд.