Рушди босуботи иқтисодӣ дар нуҳ ноҳияи ҷумҳурӣ

Душанбе, 4.12.2014. (АМИТ «Ховар», Мавҷуда Анварӣ).-Созишномаи лоиҳавие, ки дирӯз дар шаҳри Душанбе аз ҷониби муовини вазири рушди иқтисод ва савдои кишвар Умед Давлатзод ва директори кишварии Барномаи рушди СММ Норимас Шимомура имзо шуд, ба беҳтар намудани сатҳи некӯаҳволии сокинони нуҳ ноҳияи кишвар нигаронида шудааст. Чорабинии мазкур аз рӯи натиҷаи имзои Созишномаи грантӣ байни БРСММ дар ҶТ ва Сафорати Федератсияи Русия вобаста ба иҷрои лоиҳаи “Беҳтар намудани некӯаҳволии аҳолии деҳот, ки дар нуҳ ноҳияи ҶТ истиқомат мекунанд”, баргузор гардид. Лоиҳаи мазкур ба маблағи 6,7 млн. доллари ИМА аз ҷониби Ҳукумати Федератсия Русия маблағгузорӣ шуда, тавассути БРСММ дар ҳамкории зич бо Вазорати рушди иқтисод ва савдои ҷумҳурӣ дар муддати се сол амалӣ мешавад.Вазири рушди иқтисод ва савдо Шариф Раҳимзода, ҳангоми имзои Созишнома иброз намуд, ки лоиҳаи мазкур, идомаи ташаббуси барномаи рушди деҳот мебошад, ки аз ҷониби БРСММ татбиқ мешавад. Мақсади он коҳиши сатҳи камбизоатӣ, беҳтар намудани фазои тиҷоратӣ ва рушди соҳибкорӣ дар ҷумҳурӣ буд. Лоиҳаи мазкур ба рушди босуботи иқтисодӣ дар як зумра ноҳияҳои ҷумҳурӣ нигаронида шудааст. Дар доираи лоиҳа фаъолият вобаста ба беҳтар намудани фазои тиҷоратӣ, рушди соҳибкорӣ, пешниҳоди қарзҳои хурд ба намояндагони бахши хусусӣ, фароҳам овардани шароит барои ташкили ҷойҳои корӣ ва омодакунии касбии мутахассисон амалӣ мешавад.