Беҳдошти натоиҷи истифодаи замин дар Варзоб

 
            Душанбе,  02.02.2015. (АМИТ «Ховар»,  Назир Назиров).- Чанде  пеш  дар Ҳукумати   ноҳияи  Варзоб  бахшида ба Соли байналмилалии  замин  семинар   дар  мавзӯи  «Коҳиш  додани хавфи оқибатҳои  табиӣ тавассути  амалияи  устувори  истифодаи табиат»  баргузор гардид.
Ин  чорабинӣ  бо  ташаббуси Бунёди  дастгирии  ибтикороти шаҳрвандӣ  роҳандозӣ  шуда,  дар  ҳошияи  он  намоишгоҳи  технологияҳои  пок  доир  гардид. 
Дар  семинар  коршиносони  варзидаи ҷумҳурӣ  дар  мавзӯъҳои  истифодаи  замин,  чарогоҳҳо,  захираҳои об,  таҷдиди  манбаъҳои энергия, коҳиш  додани  хавфи  офатҳои  табиӣ,  усулҳои  мубориза  бо ҳашароти  зараровар  ва  бемориҳои  дарахтони  мевадор  ва  ғайра  гузориш доданд.
Қобили  зикр  аст, ки  созмони  экологии Бунёди  дастгирии  ибтикороти  шаҳрвандӣ бо  дастгирии  техникии СААД  аз  моҳи  сентябри  соли  2014  лоиҳаи  коҳиш додани  равандҳои эрозияи  заминро  дар  амал  татбиқ  менамояд. Лоиҳаи  мазкур  дар қитъаҳои  ҷамоатҳои Чорбоғ,  Лучоб ва Деҳмалики  ноҳияи  Варзоб дар  амал татбиқ  мешавад. 
Яке  аз  мақсадҳои  муҳими  лоиҳа  иборат  аз  шиносоӣ  бо  фаъолияти  судманд дар  амри истифодаи  замин  мебошад.