Иштироки тоҷикистониён дар конфронси Маскав

Душанбе,13.04.2015( АМИТ «Ховар» Марҳабои Азамат ).- Дар Донишгоҳи давлатии иктишофи геологии Русия ба номи Серго Орҷоникидзе бахшида ба 70- солагии Ғалаба дар Ҷанги Бузурги Ватанӣ Конфроси XII байналмилалии илмию амалӣ дар мавзӯи «Ғояҳои нав дар улуми оид ба замин» баргузор гардид. Дар ин бора намояндаи расмии Сафорати Тоҷикистон дар Федератсияи Русия Муҳаммад Эгамзод ба АМИТ «Ховар» хабар дод. Ба гуфтаи дипломати тоҷик, дар конфронс масоили мушкилоти экологию энергетикии истифода ва ҳифзи қаъри Замин, технологияҳои муосири иктишоф, арзёбӣ ва истихроҷи канданиҳои фоиданок, гидрогеологияи экологӣ ва таҳқиқи минтақаи Артика мавриди мухокима қарор гирифтанд. Дар кори конфронс муовини раиси ҳукумати Федератсияи Русия А.Г. Хлопонин иштирок намуда, ҳамаи ҳозиронро табрик кард. Дар конфронс сардори Сарраёсати геологияи назди Ҳукумати ҶТ Ҷумъазода Мурод Хол аз ҷониби кишвари мо маърӯза кард. Дар байни иштирокдорони хориҷии конфронс намояндагони Австралия, Алҷазоир, Ангола, Арманистон, Афғонистон, Беларус, Булғористон, Ветнам, Гурҷистон, Миср, Италиё, Ироқ, Қазоқистон, Канада, Қатар, Қирғизистон, Колумбия, ҶМЧ, Муғулистон, Нидерланд, Лаҳистон, Арабистони Саудӣ ,Судон, ИМА, Тоҷикистон, Узбекистон, Украина, Ҷумҳурии Федеративии Олмон ва кишварҳои дигари ҷаҳон ҳозир буданд.