Беҳтарин нишонзанҳои қисми якуми чемпионати Тоҷикистон маълум шуданд

Душанбе, 02.07.2015, (АМИТ- «Ховар» Меҳрони Қурбон).- Қисми аввалини чемпионати Тоҷикистон байни дастаҳои лигаи олӣ ба анҷом расид. Дар маҷмӯъ дар ин қисми чемпионат 121 гол (ба ҳисоби миёна 2,7 гол дар як бозӣ) зада шуд. Ёдовар  мешавем, ки беҳтарин нишонзани қисми якуми чемпионати Тоҷикистон ҳамлагари дастаи  “Истиқлол” Манучеҳр Ҷалилов шуд. Манучеҳр дар нӯҳ бозии нимаи аввали чемпионат ба дарвозаи ҳарифон 7 гол задааст. Бояд  зикр кард, ки легионери эронии дастаи “Равшан”-и Кӯлоб Ҳусейни Сӯҳробӣ дар сабқати нишонзанҳои лига бо 6 гол дар ҷои дуюм меистад. Хотиррасон менамоем, ки  зинаи сеюми ин сабқатро якбора ду нафар — капитани дастаи “Истиқлол” Дилшод Восиев ва ҳамлагари  дастаи “Регар-ТадАЗ” Комил Саидов бо 5 голи 
задаашон ишғол мекунанд.