Бозомӯзии кормандони МТС дар созмонҳои ҷаҳонӣ

Душанбе, 06.07.2015 (АМИТ «Ховар», Фарзонаи Давлат).-Чор нафар корманди ҷавон барои такмили ихтисос ба академияи САҲА дар шаҳри Бишкек барои иштирок дар курсҳои  асосноккунии лоиҳаҳои  иҷтимоӣ- иқтисодӣ фиристода шуд. Ин нукта дар нишасти хабарии имрӯзаи Маркази тадқиқоти стратегии назди Президенти кишвар зикр шуд. 
Бино ба иттилои масъулин, марказ барои омодасозӣ ва баланд бардоштани сатҳи тахассусии кормандон пайваста тадбир меандешад.  Ҳамчунин гуфта шуд, ки  МТС-и назди Президенти ҶТ бо як силсила  марказҳои таҳлилии дигар давлатҳо, аз ҷумла бо марказҳои таҳлилии Федератсияи Русия, Қазоқистон, Чин, Афғонистон, Ҳиндустон, Эрон, марказҳои тадқикоти стратегии Ӯзбекистон, Қирғизистон, Озарбойҷон, Туркия, Латвия, Литва, Лаҳистон низ робитаҳои  хуби корӣ дорад.