Дар Хатлон истеҳсоли маҳсулоти кишоварзӣ афзоиш ёфт

Қӯрғонтеппа, 14.07.15. (АМИТ «Ховар»,  Мурод  Сотиев). – Дар  вилояти  Хатлон  истеҳсоли  маҳсулоти  кишоварзӣ  афзоиш  меёбад.  Бино  ба  хабари  Раёсати  кишоварзии  вилоят,   тайи  6  моҳи  соли  равон ба  маблағи  2  миллиарду 973  миллиону  930  ҳазор  сомонӣ  маҳсулоти  кишоварзӣ   истеҳсол  шудааст, ки  баробари  107,9  фоизи  нақшаи  пешбинишуда  мебошад.
Дар  раёсати  мазкур  изҳор  доштанд, ки ба кишти такрории  зироатҳои  кишоварзӣ  таваҷҷӯҳи  хоса зоҳир  мегардад. Дар  масоҳати  80  ҳазору  370  гектар  кишти  такрорӣ  сурат  гирифтааст, ки  ин 89,4  фоизи  нақшаи   пешбинишударо  ташкил  медиҳад. 
Судури маҳсулоти  кишоварзӣ  нисбат  ба  солҳои  гузашта  хеле  афзуда  ва 52  ҳазору 289,7  тоннаро ташкил дод. Дар  вилоят 60  ҳазору 519  тонна  картошка ва 214 ҳазор  тонна  сабзавоти  гуногун   истеҳсол  шудааст.