Дилшод Назаров бо ордени Шараф дараҷаи 2 сарфароз гардид

Душанбе, 28.08.2015. (АМИТ “Ховар”). — Дилшод Назаров, муовини раиси Кумитаи ҷавонон, варзиш ва сайёҳӣ ва варзишгари маъруфи кишвар, ки нахустин шуда, ба бозиҳои олимпии тобистонаи соли 2016 дар Рио де Жанейраи Бразилия дар риштаи гурзандозӣ соҳиби роҳхат гардидааст, бо Фармони Президенти Ҷумҳурии Тоҷикистон бо ордени Шараф дараҷаи 2 сарфароз гардонида шуд.
Ҳамчунин, хизматҳои раиси ҷамъияти тоҷикон дар вилояти Твери Федератсияи Русия Муқим Майбалиев бо ордени Дӯстӣ қадр гардид. 
Сарояндаи Филармонияи халқии ба номи Тоҷиддин Муҳиддинови ноҳияи Ҳисор Маҳмадсаид Аҳмадов сазовори унвони фахрии Ҳунарпешаи халқии Тоҷикистон дониста шуд.
Бо унвони фахрии Арбоби илм ва техникаи Тоҷикистон Сафаров Маҳмадалӣ Маҳмадиевич, директори иҷроияи Филиали Донишгоҳи миллӣ-тадқиқотӣ “Донишкадаи энергетикии Москва” дар шаҳри Душанбе сарфароз гардид.