Даъвати Ситоди кулли Русия

Душанбе, 09.10.15. (АМИТ «Ховар»). — Ҳамаи  кишварҳои узви Созмони ҳамкории  Шанхай бояд  якҷоя  саъю  кӯшиш  ба  харҷ  дода, ба  истифодаи  Афғонистон  чун  такягоҳи  ташаннуҷи  вазъияти  Осиёи  Марказӣ  роҳ  надиҳанд,  гуфт  муовини  сардори Ситоди  кулли  Русия  Сергей  Истраков  дар конфронси  байналмилалӣ аз  рӯи  масоили  Афғонистон.
«Вазъияти ҳарбию  сиёсӣ  ба  миён  омада, пешгӯии ҷараёни  он  дар минтақаи  Осиёи  Марказӣ нишон  медиҳад, ки саъю  кӯшишҳои  якҷояи  кишварҳои  узви  СҲШ дар  амри  муқобилат  ба  ситезаҷӯӣ ва   хавфу  хатар  ба  амнияти  минтақа  аз  Афғонистон  басо   зарур  аст. Бинобар  ин,  имконоти  Созмони  ҳамкории  Шанхай аз  пештара  дида заруру   муҳимтар  аст», —  гуфт С.Истраков. 
«Имрӯз  кишварҳои  узви  СҲШ ба  хотири мустақилона  рафъ  намудани   хавфу  хатар  ба амнияти  минтақа чораҳои  яктарафаи   дорои  хусусияти  иқтисодӣ ва  сиёсию  башардӯстонаро  рӯи  кор  меоранд. Чунин  кӯшишҳо  имкон  намедиҳанд, ки ба  ситезаҷӯӣ ва  хавфу  хатарҳои  нав  ба  таври  самарабахш  муқобилат  карда  шавад», —  зикр намуд муовини сардори  ситоди кулл.
Сардори Ситоди  кулли Русия  генерали  армия  Валерий  Герасимов  чунин  гуфт: «Алҳол  дар  Афғонистон то  50  ҳазор  нафар  силоҳбадастон фаъолият  дошта,   дар  беш  аз  4  ҳазор  дастаю  грӯҳҳои  мухталиф  гирд  омадаанд. Асоси онҳоро Ҷунбиши  исломии толибон иборат  аз  қариб 40 ҳазор нафар   силоҳбадастон ташкил  медиҳад». 
Ба  гуфтаи  номбурда,  теъдоди  силоҳбадастони «Давлати  исломӣ» дар  Афғонистон афзоиш  ёфта,  ҳоло  ба  2 — 3  ҳазор нафар  расидааст. Генерал изҳор  дошт, ки  террористон  минтақаҳои нав ба  навро  таҳти назорати  худ  мегиранд.