Кормандони «Амонатбонк» малакаҳои касбиашонро такмил медиҳанд

Душанбе, 28.10.15. (АМИТ «Ховар»). — Имрӯзҳо  дар  шаҳри  Душанбе, ноҳияҳои  тобеи  ҷумҳурӣ  ва  вилояти  Хатлон  семинарҳои омӯзишии  кормандони  марказҳои   хидматрасонии  бонкӣ  идома доранд.
Чанде  пеш  дар  ноҳияи Дарвоз ва   шаҳри  Хоруғи  Вилояти Мухтори  Кӯҳистони  Бадахшон  чунин  семинарҳо   доир  шуданд, ки  мақсад  аз  онҳо иҷрои  вазифаҳои  бамиёнгузоштаи   раиси раёсати Бонки  давлатии амонатгузории  Тоҷикистон  «Амонатбонк»  Ҳакимзода  Рӯҳулло  дар  бораи баланд  бардоштани  сатҳи  дониш  ва  такмили  малакаҳои  касбии  кормандони  марказҳои   хидматрасонии  бонкӣ  мебошад.
Дар  семинарҳо  мутахассисон  аз  ҷумлаи  роҳбарон  ва  кормандони масъули  бонк  дар  бораи ҳуҷҷатҳои  қонунгузорию  меъёрӣ, ки фаъолияти  бонкиро  танзим  менамоянд,  нақл  мекунанд.
Қобили  зикр  аст, ки  вақтҳои  наздиктарин барои  кормандони  марказҳои хидматрасонии  бонкии  «Амонатбонк» дар   вилояти  Суғд чунин  семинарҳо  доир  мешаванд, ки  мақсад  аз  онҳо баланд  бардоштани  сатҳи  салоҳияти  кормандон  ва  сифати  хидматрасонӣ  ба мизоҷон  аст.