Ф. Олланд ва В. Путин амалиёт бар зидди «Давлати исломӣ»-ро дар мулоқоти Маскав муҳокима мекунанд

Душанбе, 26.11.2015. (АМИТ «Ховар»). -Президенти Фаронса Франсуа Олланд аллакай бо Канслери Олмон Ангела Меркел гуфтушунид анҷом дод, акнун мехоҳад, ки дар мубориза бо терроризм аз ҷониби Путин дастгирӣ ёбад. Дар ин бора расонаҳои Фаронса ва Русия иттилоъ додаанд. 
Президенти Фаронса Франсуа Олланд ва Президенти Русия Владимир Путин 26-уми ноябр дар Маскав мулоқот мекунанд.
Дар остонаи сафари корӣ ба Маскав Президенти Фаронса иттилоъ дод, ки дар ҷараёни мулоқот дар пойтахти Русия ният дорад зарурати амалиёти муштаракро бар зидди ДИ ба миён гузорад. Ф. Олланд зикр намуд, ки Фаронса барои тезутунд нашудани муносиботи Русия ва Туркия пас аз ҳодисаи сарозер шудани ҳавопаймои бомбапартои Русия баромад мекунад. Ин изҳоротро Президенти Фаронса зимни мулоқот бо Канслери Олмон Ангела Меркел дар қасри Елисей баён дошт.
«Он чи ки рух дод, ҳодисаи бисёр ҷиддист. Мо зидди ташаннуҷи вазъем. Бояд ҳамаи имконот истифода шаванд, то ки ҳарчи зудтар миёни Русия ва Туркия гуфтушунид барқарор шавад», — гуфт Олланд.
Канслери Олмон Ангела Меркел муҳимияти сафари Президенти Фаронса Франсуа Олландро ба Русия ва ИМА дар робита ба зарурати мубориза бо гурӯҳи «Давлати исломӣ» ва раванди умумии сиёсӣ таъкид кард.