Навсозии шоҳроҳи дарозтарин дар Суғд

Хуҷанд, 24.11.15. (АМИТ «Ховар»). -Ба иттилои дафтари матбуотии раиси вилояти Суғд дар миқёси вилоят боз як   лоиҳаи калони байналмилалӣ, таъмиру навсозии яке аз шоҳроҳҳои дарозтарин дар вилоят — шоҳроҳи минтақаи Деҳмойи ноҳияи Ҷаббор Расулов- Бобоҷон Ғафуров -Конибодом -Исфара то минтақаи сарҳадии Қирғизистон бо харҷи 56 миллион доллари амрикоӣ амалӣ хоҳад шуд. 
Раиси вилояти Суғд зимни сафари кориӣ ба ноҳияи Конибодом, аз минтақаи ин роҳ дидан намуда, баён дошт, ки шаҳри Конибодом дар маркази ин шоҳроҳ қарор дорад ва ба туфайли ин иқдом метавонад аз як тараф бо шаҳри Хуҷанд, аз тарафи дигар бо шаҳри Исфараву Ҷумҳурии Қирғизистон ва ниҳоят аз самти дигар бо водии  Фарғонаи Ҷумҳурии Ӯзбекистон тавассути деҳаи Патар пайваст шуда, шароити мусоиди рафтуомад дошта бошад.