Ш.Саид: «Барои татбиқи лоиҳаҳои муштараки Тоҷикистону Ҳиндустон саъю кӯшишҳои якҷоя мебояд»

Душанбе, 16.12.15. (АМИТ «Ховар»). — 15  декабр  раиси Палатаи  савдо  ва  саноати  Тоҷикистон Шариф  Саид  ва  сафири  Ҳиндустон  дар  Тоҷикистон Бираҷан Прасад  дар  ҷараёни  мулоқот  дурнамои  ҳамкорӣ дар  бахши  тиҷорату  иқтисодиёт  ва  ҳамкории  миёни  палатаҳоро, ки ба  фикри  мусоҳибон   бояд  густариш дода шаванд, мавриди  муҳокима  қарор доданд.
Қобили  зикр  аст, ки  байни Тоҷикистону  Ҳиндустон Комиссияи муштараки байниҳукуматӣ  оид ба  ҳамкории  тиҷоратию  иқтисодӣ  ва илмию  техникӣ  фаъолият  дорад. 
«Барои  татбиқи  лоиҳаҳои   муштарак  дар  бахшҳои  мухталиф имкониятҳои  бузург мавҷуданд, ки барои  амалӣ  шудани онҳо  бояд якҷоя  саъю  кӯшиш  намуда,  ҳамкории   бахши  инфиродии  ҳар  ду  кишвар  вусъат  дода шавад»,  —  гуфт  раиси ПСС ҶТ. 
Дар  баробари  ин,  дар  Тоҷикистон  барои  ҷалби   сармояҳои  хориҷӣ,  дастгирии   сохторҳои  бозаргонӣ  ва рушди   низоми  тиҷоратӣ  ва молиявию  бонкӣ шароити  мусоид  фароҳам оварда шудааст.  Ш.Саид ҳамчунин   пешниҳод  намуд, ки  масъалаи ташкили  Шӯрои  аҳли тиҷорати «Тоҷикистону Ҳиндустон»  таъсис  дода, намояндагиҳои  муштараки  тиҷоратию иқтисодӣ  ташкил  карда шаванд. 
Ёдовар  мешавем, ки  имсол  дар  шаҳри  Душанбе,  ҳамчунин  дар  вилоятҳои  Хатлону  Суғд шаш намоишгоҳи амволи Ҳиндустон  доир  гардид.