Суди ноҳияи И.Сомонӣ: ҷазо барои риоя накардани Қонун «Дар бораи забони давлатии Ҷумҳурии Тоҷикистон»

Душанбе, 10.12.2015. (АМИТ «Ховар) —  Суди ноҳияи Исмоили Сомонии шаҳри Душанбе парвандаи ҳуқуқвайронкунии маъмуриро нисбати Илҳбонов Ширинбек Давлатбекович бо моддаи 89 Кодекси ҳуқуқвайронкунии маъмурии Ҷумҳурии Тоҷикистон мавриди баррасӣ қарор дод. Номбурда  талаботи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» -ро вайрон намудааст, ки дар асоси он нисбаташ  аз ҷониби прокурори ноҳияи Исмоили Сомонии шаҳри Душанбе парвандаи ҳуқуқвайронкунии маъмурӣ оғоз шудааст.  Илҳбонов Ширинбек Давлатбекович бар хилофи талаботи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» амал намуда, номи маркази савдоаш  бо забони ғайридавлатӣ «CHOCO night club»    навишта шудааст.
       Дар асоси талаботи қисми 2 моддаи 18 Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» ҳамаи лавҳаю овезаҳо дар Ҷумҳурии Тоҷикистон ба забони давлатӣ навишта мешаванд.
           Илҳбонов Ширинбек Давлатбекович дар содир намудани ҳуқуқвайронкунии маъмурӣ бо моддаи 89 Кодекси ҳуқуқвайронкунии маъмурии Ҷумҳурии Тоҷикистон гунаҳгор дониста шуда, ба ӯ бо ҳамин модда ҷазо дар намуди ҷаримаи маъмурӣ ба андозаи 15 (понздаҳ) нишондиҳанда барои ҳисобҳо, баробар ба 600 (шаш сад) сомонӣ ба фоидаи давлат таъйин карда шуд.