Ҳамкории фарҳангиву ҳунарии донишгоҳҳои фарҳангии Тоҷикистону Эрон беҳтар мегардад

Душанбе, 08.01.2016. (АМИТ «Ховар»).-Дар нишасти раисони донишгоҳҳои ҳунарии кишварҳои узви Созмони Ҳамкории Иқтисодӣ (ЭКО), ки дар шаҳри Теҳрони Ҷумҳурии Исломии Эрон баргузор гардид, роҳбарони муассисаҳои таҳсилоти олии касбии фарҳанг ва ҳунари ҷумҳуриҳои Тоҷикистон, Афғонистон, Покистон ва Туркия иштирок намуданд.
Дар вохӯрӣ роҳбарони ҳайатҳо дар мавриди сатҳу сифати ҳамкории фарҳангии кишварҳои узви ЭКО сухан гуфтанд.
Дар ҳамоиши мазкур ректори Донишкадаи давлатии фарҳанг ва санъати Тоҷикистон ба номи М. Турсунзода Д. Латипов оид ба ҳамкорӣ миёни таълимгоҳҳои ҳунарии Тоҷикистону Эрон ва самтҳои афзалиятноки рушди он сухан карда, «Муаррифӣ»-и ДДФСТ ба номи М.Турсунсоза ба аҳли толор пешкаш шуда, сипас дар интиҳои ҷаласа тафоҳумнома ба имзо расонида шуд, ки ба густариши ҳамкории минбаъдаи фарҳангиву ҳунарии донишгоҳҳои фарҳанг ва ҳунар мусоидат менамояд.
Бино ба гуфтаи ректори Донишкадаи давлатии фарҳанг ва санъати Тоҷикистон ба номи М. Турсунзода Д. Латипов дар маҷмӯъ сафари мазкур бо назардошти тадбирҳои амалигардида судманд ва манфиатнок анҷом пазируфта, ҳадафи асосии сафар ба имзо расонидани тафоҳумнома байни ДДФСТ ба номи М. Турсунзода ва Донишгоҳи ҳунарии шаҳри Теҳрони Ҷумҳурии Исломии Эрон арзёбӣ мешавад.