Дар вилояти Суғд олимпиадаи мактабиён оғоз ёфт

Хуҷанд, 13.01.2016. (АМИТ «Ховар»). -Имрӯз дар бинои таълимии Донишгоҳи давлатии ҳуқуқ, бизнес ва сиёсати вилояти Суғд даври вилоятии олимпиадаи мактаббачагон аз рӯи фанҳои таълимӣ бо иштироки соҳибони ҷойҳои ифтихорӣ ва иштирокдорони фаъоли даври шаҳриву ноҳиявӣ оғоз ёфт.
Ёдовар мешавем, ки даври вилоятии олимпиадаи мактабиён 4 рӯз идома менамояд. Рӯзи аввал хонандагон аз рӯи фанҳои гуманитарӣ донишу маҳорати худро месанҷанд. Рӯзҳои минбаъда толибилмон аз рӯи фанҳои дақиқ қувваозмоӣ менамоянд.
Як ҷиҳати фарқкунандаи олимпиадаи имсола дар он аст, ки ба соҳибони ҷойҳои чорум ва панҷуми даври шаҳриву ноҳиявӣ низ имкони иштирок намудан дар он дода шудааст.