Шиносоии Сарвазир бо фаъолияти «Комбинати маъдантозакунии Такоб»

Душанбе, 07.01.2016. (АМИТ «Ховар»). — Имрўз  Сарвазири  мамлакат  Қоҳир  Расулзода  бо  фаъолияти Ҷаъмияти  саҳомии  шакли  кушодаи «Комбинати  маъдантозакунии Такоб» дар  ноҳияи  Варзоб  шинос  шуд.

Ҳоло дар заминаи корхонаи мазкур фабрикаи маъдантозакунӣ бунёд гардида, барои истеҳсоли хокаи флюарит, сурб ва рўҳ  пешбинӣ шудааст. Барои  истеҳсоли ин маҳсулот технологияи зарурӣ дар корхона насб гардида, коргоҳ  омодаи  истеҳсоли таҷрибавӣ мебошад. Хокаи флюарит асосан дар саноат ҳамчун ашёи хом барои истеҳсоли криоллит пешбинӣ шуда, дар саноати  алюминий васеъ истифода бурда мешавад. Тавре иттилоъ дода шуд, иқтидори корхона айни замон ба истеҳсоли 30 ҳазор тонна маҳсулоти флюарит дар як сол баробар аст.

Сарвазири мамлакат барои ҳарчӣ зудтар ба роҳ мондани истеҳсоли хокаи флюарит дар ин корхона ва истифодаи он ҳамчун ашёи хоми маҳалӣ дар соҳаи саноат ба масъулин дастуру супоришҳои дахлдор дод.