Соли 2016 ба соҳаи маориф 3 146,2 млн. сомонӣ пешбинӣ гардидааст

Душанбе, 06.01.2016. (АМИТ «Ховар»). -Соли 2015 аз Буҷети давлатӣ барои соҳаи маориф 2 млрд. 918 млн. 639 ҳазор сомонӣ ҷудо карда шуд, ки ин нисбат ба соли гузашта 401 млн. сомонӣ ё ин ки 16% зиёд мебошад. Маблағе, ки ба соҳаи маориф дар соли 2015 ҷудо шудааст, 19,1% Буҷети давлатиро ташкил дода, ба 5,5 фоизи маҷмӯи маҳсулоти дохилӣ баробар аст.
Новобаста аз буҳрони молиявию иқтисодие, ки дар тамоми дунё паҳн шудааст, Ҳукумати Ҷумҳурии Тоҷикистон афзоиши маблағғузории соҳаи маорифро дар соли 2016 низ идома додааст. Дар Буҷети давлатӣ барои соли 2016 ба соҳаи маориф 3 146,2 млн. сомонӣ пешбинӣ гардидааст, ки ин нисбат ба соли 2015 — 227,6 млн. сомонӣ ё ин, ки 7,8% зиёд мебошад. Маблағи мазкур 17% ҳаҷми умумии хароҷоти буҷети давлатиро ташкил дода, ба 5,5% маҷмӯи маҳсулоти дохилӣ баробар мебошад.
Муассисаҳои соҳаи маориф барои иҷрои супориши Сарвазири Ҷумҳурии Тоҷикистон вобаста ба таъмини эҳтиёҷоти соҳаи маориф бо истеҳсолкунандагони ватанӣ харидории молу маҳсулоти саноати сабук ва либосҳои мактабиро ба роҳ мондаанд.
Ҳамзамон бояд тазаккур дод, ки соли равон дар миқёси ҷумҳурӣ бо муассисаҳои соҳаи маориф аз тарафи 110 коргоҳи дўзандагии ватанӣ шартнома ба имзо расид. Таҳлил собит сохт, ки дар ин коргоҳҳо бо истифодаи 3615 мошинаи дарздузӣ ба миқдори 306 ҳазору 668 адад либоси мактабӣ дўхта, ба истифода дода шуд.