Заҳролудшавии аъзои як оила дар Кӯлоб

Душанбе, 07.01.2016. (АМИТ «Ховар»). — 4 январи соли с.2016, тахминан соати 16:30 сокинони маҳаллаи Борбади шаҳри Кулоб: Бадараева Шарифамоҳ Бедиловна, соли таваллудаш 1954 бо ҳамроҳии фарзандонаш: Одинаева Гулчеҳра Саидовна, соли таваллудаш 1984, Одинаев Рустам Саидович, соли таваллудаш 1989, Одинаева Тоҷиниссо Саидовна, соли таваллудаш 1983, Одинаев Амирхон Саидович, соли таваллудаш 1985 ва набераи ноболиғаш Кабирова Гулнисо Аюбовна, соли таваллудаш 2007, дар хонаи истиқоматиашон ҳангоми истеъмол намудани хӯрок ва хӯришҳо аз помидору бодиринги шӯркардашуда заҳролуд шудаанд.

Дар натиҷа, рӯзи 5 январ шаҳрванд Г. Одинаева бинобар сабаби заҳролуд шудан дар хонаашон ба ҳалокат расидааст. Рӯзи 6-уми январ шаҳрванд Ш. Бадараева дар ҳолати вазнин, фарзандонаш, Р. Одинаев, А. Одинаев, Т. Одинаева ва ноболиғ Г. Кабирова дар беморхона бистарӣ шудаанд. Худи ҳамин рӯз Ш. Бадараева дар беморхона ба ҳалокат расида, ноболиғ Г. Кабирова баъди расонидани ёрии аввалини тиббӣ аз беморхона ҷавоб шуда, дар хонаашон ба ҳалокат расидааст.