«Барқи Тоҷик» 622,1 млн.кВт.соат зиёд энергияи барқ истеҳсол кард

Душанбе, 4.02.2016 (АМИТ «Ховар»).-Дар соли 2015 ҳаҷми истеҳсоли энергияи барқ 14 млрд. 390,1 млн.кВт.соатро ташкил дод, ки ин нисбат ба ҳамин давраи соли гузашта 622,1 млн. кВт.соат зиёд аст. Ин нуктаро имрӯз зимни нишасти матбуотӣ раиси ШСХК «Барқи Тоҷик» Исмоилзода Мирзо Иброҳим таъкид кард.
Бино ба гуфтаи Исмоилзода Мирзо ҳаҷми истеҳсоли энергияи барқ дар неругоҳҳои барқи обии ширкат ба 14 млрд. 81,0 млн. кВт.соат, дар марказҳои барқу гармидиҳӣ ба 301,8 млн. кВт.соат ва дар неругоҳҳои барқӣ обии хурди таҳти назорати ширкати “Барқи Тоҷик” ба 7,3 млн. кВт.соат баробар шуд.
“Ҳаҷми истеҳсоли энергияи гармӣ дар давраи ҳисоботӣ ба 284,7 ҳазор Гкал баробар шуда, нисбат ба соли гузашта дар ҳаҷми 167,5 ҳазор Гкал зиёд мебошад”,-илова намуд раиси “Барқи Тоҷик”.