Мусобиқаҳои варзишӣ бахшида ба Рӯзи таъсиси Қувваҳои мусаллаҳ

Душанбе, 09.02.2016. (АМИТ «Ховар»).-Дар Вазорати мудофиаи Ҷумҳурии Тоҷикистон бо ҷалби дастаҳои варзишии ҷузъу томҳо пайваста мусобиқаҳои гуногун доир мешаванд.
Дар доираи омодагиҳо ба муносибати 23-юмин солгарди таъсиси Қувваҳои Мусаллаҳи Ҷумҳурии Тоҷикистон дар Маҷмааи варзишии солимгардонии шаҳри Душанбе байни афсарон ва прапоршикони дастгоҳи марказии Вазорати мудофиа, Ситоди генералии Қувваҳои Мусаллаҳ, раёсатҳои навъҳои қӯшунҳо ва Донишкадаи ҳарбии ҷумҳурӣ мусобиқаи варзишӣ доир гардида, он аз рӯи намудҳои волейбол, футболи хурд, шиноварӣ, гирбардорӣ, тенниси рӯи миз ва тирпаронӣ ба роҳ монда шуд.
Ҳамин тариқ, оғози мусобиқаи навбатии ҳайати афсарону прапоршикони Вазорати мудофиа, муассисаҳои таълимии зертобеи он ва дигар ҷузъу томҳои навъҳои қӯшуни Артиши миллии Тоҷикистон бо иштироки хизматчиёни ҳарбӣ аз рӯи навъи бозиҳои волейбол ва шиноварӣ ҷараён дорад.
Мусобиқаи варзишӣ ҳар ҳафта рӯзҳои сешанбе ва панҷшанбе байни ҳамаи дастаҳои иштирокдор то санаи таҷлили 23-юмин солгарди таъсиси Қувваҳои Мусаллаҳи Ҷумҳурии Тоҷикистон идома хоҳад ёфт.