Чорабинӣ бахшида ба Рӯзи матбуот бо ташаббуси ВКД

Душанбе, 14.03.2016. (АМИТ «Ховар»). — 12 март бо ташаббуси вазири корҳои дохилӣ Раҳимзода Рамазон Ҳамро дар машқгоҳи таълимии «Марғоб»-и Вазорати корҳои дохилӣ, воқеъ дар дараи Ромити шаҳри Ваҳдат бахшида ба Рӯзи матбуоти тоҷик чорабинии фарҳангӣ-фароғатӣ баргузор гардид.
Дар он намояндагони васоити ахбори омма, аз ҷумла аз телевизиони Тоҷикистон, АМИТ «Ховар», шабакаи телевизионии «Мир», хабаргузориҳои «РИА Новости», «Азия-Плюс», «Омӯзгор», «Озодагон», «СССР», «Фараж», Маркази тадқиқоти журналистии Тоҷикистон, «Ҷавонони Тоҷикистон» ва дигар рӯзноманигорони бахшҳои иттилоотӣ иштирок намуданд.
Хабарнигорон таҳти роҳбаладии роҳбари дастгоҳи вазири корҳои дохилӣ аз синфхонаи таълимӣ, хобгоҳи сарбозон, нуқтаи тиббӣ, ошхонаи тобистонаву зимистона, майдончаҳои варзишӣ, нуқтаи идоракунии амалиёт дидан намуда, бо фаъолияти ин марказ шинос шуданд.
Барои болидарӯҳӣ ва хотирмон гузаронидани ин чорабинӣ мусобиқаи варзишӣ, аз намуди шоҳмоту шашка ва домино доир шуд.
Баъдан дар чорабинии мазкур бахшида ба рӯзи матбуот, озмуни ҳозирҷавобон гузаронида шуда, вобаста ба масъалаҳои гуногуни соҳаҳои ҳаёти ҷомеа саволу ҷавоб баргузор гардид, ки намояндагони ВАО дар он иштироки фаъолона намуданд.
Дар фарҷоми чорабинӣ ба ғолибони мусобиқаҳо туҳфаҳо аз номи вазири корҳои дохилӣ супорида шуданд.